Во несреќа што се случила на француската страна на тунелот под Ла Манш, деветнаесет лица се повредени откако минибус се судрил со железнички шатл-превозник за автомобили. Две од повредените се итно пренесени со хеликоптер во болница.
Инцидентот се случил во четвртокот вечерта, на 15 октомври, во близина на Кокел, во северна Франција, близу Кале. Минибусот превезувал возачи на камиони кои требало да се качат на железничкиот шатл што ги поврзува Франција и Велика Британија.
Според првичните информации, минибусот удрил во страничниот дел на возот додека бил на платформата за качување, но причините за несреќата досега не се познати. Во судирот бил повреден возачот на минибусот и уште 18 патници.
Две лица имаат посериозни повреди и биле транспортирани со хеликоптер, додека останатите 17 повредени минале со полесни повреди. Според надлежните, никој не е во непосредна животна опасност.
На местото на несреќата веднаш пристигнале многубројни спасувачки екипи, пожарникари, полицајци и медицински персонал. Во акцијата за справување со последиците учествувале околу 200 лица.
По инцидентот, железничкиот шатл-превоз бил прекинат за околу 90 минути, а потоа сообраќајот постепено бил обновен. Редовните линии на „Еуростар“ и товарниот железнички сообраќај не биле засегнати.
Француските власти започнаа истрага за да ги утврдат околностите и причините за несреќата. Според локалните претставници, ова е прв таков инцидент на платформата за товарење возила од отворањето на тунелот во 1994 година.
