Франција се наоѓа пред сериозни немири, со повеќе од половина милион луѓе кои протестираат по улиците на 17 октомври против високите трошоци за живот, порастот на цените и проблемите во јавните услуги. Протестите се трансформираа во насилни судири, вандализам и грабежи во неколку градови, а властите се под зголемен притисок да реагираат на незадоволството на населението.
Според светските медиуми, за време на протестите, речиси 1.800 лица биле приведени, а повеќе од 500 полицајци повредени. Има и еден смртен случај поради срцев удар за време на демонстрациите во Париз.
Немирите се проширија на различни места низ Франција. Во Лимож беше запалено дел од градското собрание, додека во Марсеј демонстрантите упаднаа во зградата на локалната управа, оставајќи графити. Во Лион, туристичкиот информативен центар беше запален.
Во Париз, некои од протестантите кршеа витрини, ограбуваа продавници и се судрија со полицијата. Безбедносните сили употребија солзавец за да ги растераат насилниците, а во некои делови од градот беа забележани опожарени предмети и оштетени згради.
И покрај тоа што многу од собирите започнаа мирно, одредени групи предизвикаа сериозни инциденти, напаѓајќи полицајци и уништувајќи имот.
Протестите отпочнаа во септември, кога средношколци од сиромашните предградија на Париз излегоа на улиците поради недостигот на наставници и лошите услови во училиштата. Со текот на времето, незадоволството се прошири на други општествени проблеми, вклучувајќи растечките трошоци за живот, нееднаквоста и намалувањето на јавните услуги.
Демонстрантите бараат зголемување на платите и пензиите, намалување на цените и подобра заштита на јавните услуги. Некои од нив сметаат дека владините политики дополнително го отежнуваат животот на граѓаните, особено на семејствата со пониски приходи.
Овие немири потсетуваат на протестите на „жолтите елеци“ од 2018 година, кога Франција беше потресена поради социјалната неправда и високите трошоци на живот.
Францускиот претседател Емануел Макрон го осуди насилството, додека премиерот Себастијан Лекорни изјави дека владата нема да се предаде на притисоците од насилните групи, обвинувајќи ги екстремната левица и криминалците за дел од инцидентите.
Оваа ситуација доаѓа во чувствителен политички период, со предстоечите претседателски избори во 2027 година. Растечкото незадоволство од економската состојба, јавните услуги и владините политики дополнително го зголемува притисокот врз француското раководство. Додека властите почнуваат да оценуваат штетите и планираат поддршка за погодените бизниси, останува неизвесно дали протестите ќе продолжат и какви последици ќе имаат за политичката и општествената ситуација во земјата.
