Тригодишно кафеаво мече, со тежина од околу 70 килограми, било спасено во регионот Чеплес, близу Велес, откако се заглавило во нелегално поставена сајла во близина на Рибник Нежилово.
Животното било заробено во примката, по што се интервенирало од страна на надлежните служби и ветеринар од скопската Зоолошка градина. По прегледот, мечката била ослободена од сајлата и повторно пуштена во природата, без видливи повреди.
Инцидентот бил пријавен од Ловечкото друштво „Руен“ од Велес, а на терен излегле државни инспектори, полициски службеници и ловџии кои учествувале во акцијата за спасување. Јавниот обвинител бил известен за случајот, а нелегално поставената сајла е одземена и ќе биде предмет на вештачење со цел да се откријат сите околности поврзани со ситуацијата.
Овој настан повторно ја истакнува опасноста од нелегалните примки во природата, кои можат да загрозат дивите животни и да предизвикаат сериозни последици за нивниот опстанок.
