Во Гостиварско се спроведува интензивна потрага за исчезнато лице, откако стигнаа информации дека лицето е видено во близина на реката Вардар. Акцијата е иницирана од Полициската станица Гостивар и во неа учествуваат специјализирани екипи на Дирекцијата за заштита и спасување (ДЗС).
Спасувачките тимови, вклучувајќи го Тимот за брз одговор за спасување на води, работат со логистичка поддршка од подрачното одделение на ДЗС во Гостивар. На терен се наоѓа и заменик-директорот на Дирекцијата, Кашмир Салиу.
Екипите дејствуваат во тесна соработка со полицијата и локалните служби, а пребарувањето се фокусира на течението на Вардар, од критичните точки во градот до деловите низводно, со цел што побрзо да се пронајде исчезнатото лице.
Потрагата продолжува и покрај тешките услови на теренот и особеностите на речното корито. ДЗС нагласува дека тимовите ќе продолжат со работата сè до завршувањето на акцијата.
Надлежните упатуваат повик до жителите на Гостивар и околните места да ја известат полицијата или другите служби ако имаат информации за исчезнатото лице или забележат нешто во околината на реката. Информациите можат да се пријават и на бројот 112.
Засега нема информации за идентитетот на лицето или условите под кои исчезнало, а јавноста ќе биде дополнително информирана за текот на потрагата.
