Возачите од утре ќе плаќаат пониски цени за гориво. Регулаторната комисија за енергетика донесе одлука за намалување на цените на сите нафтени деривати, кои ќе стапат на сила на 6 октомври во 00:01 часот.
Најзначајното намалување се однесува на дизелот, чии максимални малопродажни цени се намалуваат од 100 на 97 денари за литар, што значи опадок од три денари.
Цените на бензините исто така ќе се намалат. ЕУРОСУПЕР БС-95 ќе се продава за најмногу 98,50 денари за литар, а ЕУРОСУПЕР БС-98 за 100,50 денари. За двата вида бензин, намалувањето изнесува 1,50 денари за литар.
Намалување има и кај екстралесното масло за домаќинство, кое поевтинува за три денари, додека цената на мазутот се намалува за 0,285 денари за килограм.
Од Регулаторната комисија објаснуваат дека новата пресметка е резултат на падот на референтните цени на нафтените деривати на глобалните берзи. Најзначително намалување е забележано кај дизелот, со пад од 4,770 проценти, а кај бензините падот е 2,885 проценти, кај екстралесното масло 4,384 проценти, а за мазутот 1,807 проценти.
