Во Калифорнија се случи несреќа која повторно го отвори прашањето за безбедноста на помошните системи за возење. Автомобилот „Тесла“, со активирана функција за автономно управување, удри во полициско возило на автопатот I-80, при што двајца полицајци беа сериозно повредени.
Според податоците од Калифорниската сообраќајна патрола, полицајците се наоѓале на местото на претходна несреќа во близина на Ферфилд. Неколку сообраќајни ленти биле затворени и просторот бил јасно означен со предупредувачки сигнали, конуси и запалени факели. И покрај тоа, автомобилот продолжил да вози низ затворениот дел и удрил во задниот дел на полициското возило.
Овој инцидент беше забележан на снимките од полициските камери, кои потоа беа објавени од надлежните. Двајца полицајци што се наоѓале надвор од возилото успеале да се избегнат, но нивните колеги, кои биле во полициското возило, беа тешко повредени.
Возачот на „Теслата“, 22-годишен маж од Сакраменто, навел дека во моментот на несреќата спиел и користел технологијата за помош при возење. Тој поминал со полесни повреди, додека повредените полицајци беа пренесени во болница, а подоцна се вратија дома на лекување.
Од Калифорниската сообраќајна патрола нагласиле дека, иако системот се нарекува Full Self-Driving, тоа не значи целосна автономија. Технологијата за помош при возење бара постојан надзор од возачот, кој мора да биде буден и подготвен да реагира.
„Технологијата не ги ослободува возачите од одговорноста за безбедно управување со возилото“, предупредуваат од надлежните.
Истрагата за несреќата продолжува, а полицијата ќе анализира податоците од автомобилот за да утврди што точно се случувало пред судирот.
