Тешка авионска несреќа ја потресе Флорида, каде приватен авион тип „Learjet 60“ се урна во округот Палм Бич, при што загинаа сите девет лица на бордот.
Несреќата се случи во неделата, на 1 ноември, околу 12:50 часот по локално време, недалеку од Гринекрс. Авионот леташе од Остин, Тексас, кон аеродромот Норт Елеутера на Бахамите.
Според Федералната администрација за воздухопловство (FAA), леталото започнало нагло и неконтролирано да се спушта со брзина од околу 350 стапки во секунда пред да удри во земјата, предизвикувајќи силна експлозија и пожар, што довело до создавање голем кратер.
Особено вознемирувачки се последните моменти од летот. Аудиоснимките од комуникацијата со контролата за летање откриваат дека пилотот првично пријавил проблеми со замрзнување и турбуленции, а потоа побарал помош кога авионот започнал нагло да ги губи височините.
Во последната порака, пилотот пријавил дека авионот се спушта со брзина од 20.000 стапки во минута, објавувајќи дека немаат доволно време и дека ќе се урнат. Следењето на летот покажало дека според некои податоци, спуштањето достигнало и над 32.000 стапки во минута.
Несреќата не само што ги погоди патниците во авионот, туку ја зафати и околината. Леталото се урнало близу станбена населба со мобилни куќи, каде што оштетени беа некои објекти.
Локалните власти евакуирале околу 600 жители од близината, а дел од улиците биле затворени поради интервенцијата на итните служби и истрагата.
Американскиот секретар за транспорт, Шон Дафи, ја оцени несреќата како ужасна трагедија, потврдувајќи дека сите девет патници загинале. Истрагата ја предводи Националниот одбор за безбедност во транспортот (NTSB), со поддршка од FAA, а за сега не е утврдена причината за падот, и ќе се анализираат сите околности на трагичниот настан.
