Шокантен инцидент ја згруши Атина, откако во изнајмен стан во населбата Кипсели е откриено мртво бебе, чие тело било скриено во куфер.
Според првичниот форензички извештај, телото имало повеќе од 10 убодни рани во грбот, со различни длабочини, а повеќекратните повреди најверојатно се причината за смртта.
Поради состојбата на телото, форензичарите не успеале да утврдат точно кога бебето починало, ниту неговата возраст. Првичните проценки говорат дека станува збор за бебе старо околу осум до девет месеци.
Телото било откриено во неделата во изнајмен стан на улица Тасос, кога полицијата пристигнала, куферот го носеле 38-годишна Германка и нејзината 15-годишна ќерка, кои сакале да го напуштат станот.
Жената тврдела дека бебето било нејзино и дека починало пред околу осум месеци. Полицијата ги уапсила неа, нејзиниот 43-годишен грчки партнер и 15-годишната девојка под сомнение за непријавување на пронаоѓањето на телото. Уапсен бил и 26-годишен маж од Авганистан, кој велел дека е во врска со малолетната девојка.
Во меѓувреме, 15-годишната девојка и две момчиња, на возраст од девет и 12 години, се сместени под заштитен надзор во Детската болница „Аја Софија“. Тековно се спроведуваат ДНК-анализи за да се утврдат нивните роднински врски, како и поврзаноста со лицата кои се претставувале како нивни родители.
При претресот на станот, полицијата пронашла и секс-играчки во куферот.
Полицијата влегла во станот откако сопственикот пријавил дека станарите не ја плаќале киријата и одбивале да го напуштат објектот, како и дека постоело сомнение за користење на дрога.
Истрагата продолжува, а грчките власти работат на утврдување на точните околности на смртта на бебето и на евентуалната одговорност на лицата во станот.
