Во авион на American Airlines се случила невообичаена сцена, кога патник во прва класа започнал агресивно да се однесува, напаѓајќи и удирајќи други патници. Инцидентот се случил на летот AA 618, кој летаеше од Далас-Форт Ворт кон Њуарк. Околу два часа по полетувањето, 67-годишниот Артур Лундин почнал да вика и да упатува навреди кон околните. Според сведоците, ситуацијата брзо ескалирала кога физички го нападнал соседот.
Претходно, Лундин се обидел да го фати соседот за вратот, а кога други патници се обиделе да интервенираат, станал уште поагресивен. Еден од патниците изјавил дека бил каснат за раката, оставајќи му траги од забите. На крајот, екипажот и неколку патници успеале да го совладаат, при што неговите раце биле врзани со пластични врски, а со селотејп бил прицврстен за седиштето за да не може повторно да напаѓа.
Пилотот одлучил да го пренасочи авионот кон Балтимор поради сериозноста на ситуацијата. По слетувањето, во авионот влегле полицијата и агенти на ФБИ, кои го уапсиле Лундин. American Airlines потврди дека летот бил пренасочен поради „непримерно однесување“ и нагласи дека безбедноста на патниците и екипажот им е приоритет. По проверката на авионот, летот продолжил кон Њуарк, а ФБИ истражува дали ќе бидат поднесени федерални обвиненија против патникот.
