Марко Бојковиќ стана шампион на ФНЦ организацијата во лесна категорија, откако го нокаутира Лом-Али Ескиев во првата рунда на спектаклот што се одржа во Скопје. Овој српски ММА-борец ја постигна најзначајната победа во својата кариера, а по мечот не можеше да ги контролира емоциите.
Во своето обраќање, Бојковиќ сподели за тешкиот пат кон освојувањето на шампионскиот појас, здравствените предизвици за време на подготовките и својата љубов кон Србија, но исто така испрати и порака за единство до целиот регион.
Тој откри дека до овој триумф не стигна лесно, бидејќи се соочуваше со сериозни повреди на коленото, но тоа не го спречи да влезе во кафезот и да ја оствари својата цел. По добивањето на титулата, искрено зборуваше за патот што поминале тој, неговото семејство и неговиот тим.
„Патот беше многу тежок, моето семејство и мојот тим знаат тоа. Немам лигаменти и коленото ми беше вкочано еден месец. Сепак, успеавме да се подготвиме за борбата“, рече Бојковиќ.
Тој истакна дека, и покрај она што се случувало во Србија, секогаш ќе се бори за својата земја. „Србија секогаш ќе биде најдобра каде и да се борам. Никој нема да ме убеди дека мојата земја не ме сака, а сите од регионот сме браќа. Ве сакам сите и никој нема да ме убеди во спротивното“, додаде тој.
По емотивното говорење, Бојковиќ се осврна на здравствените проблеми кои значително му отежнале подготовките. Резултатите од магнетната резонанца не биле охрабрувачки и укажувале на можноста дека можеби нема да биде вистински подготвен за борбата, но тој верувал во своите способности и на крајот успеал да ја достигне победата.
