Младата Јована Станковска од Куманово постигна голем животен и академски успех – го положи последниот испит на Правниот факултет при Универзитетот „Св. Кирил и Методиј“ во Скопје и официјално го заврши своето студирање.
Јована, која се бори со церебрална парализа, сподели својата радост со следбениците на социјалните мрежи, не криејќи ја среќата по завршувањето на важното поглавје во нејзиниот живот.
Во својата порака, таа истакна дека ова не е крај, туку нов почеток во нејзиниот живот. „Денес го затворив едно од најубавите поглавја, го положив последниот испит од Правен факултет на УКИМ. Продолжуваме со животните предизвици“, напиша Јована.
Нејзиниот успех е резултат на посветеност, учење, истрајност и семејна поддршка. Приказната на Јована поттикнува важна расправа за потребата од поголема пристапност и еднакви услови во образованието за лицата со попреченост.
За Јована, постигнувањето на последниот испит е завршница на значајно поглавје, но и старт на нови можности. Таа е решена да продолжи напред со нови цели и предизвици.
