Американскиот инфлуенсер Брејден Питерс, познат на социјалните мрежи како Клавикулар (Clavicular), е обвинет по две точки за силување во случај поврзан со наводен сексуален напад врз 17-годишна девојка во семејниот дом на неговите родители на Кејп Код, во Масачусетс.
Според американските медиуми, 20-годишниот Питерс е обвинет дека во мај 2025 година ѝ давал алкохол на малолетната девојка, по што наводно сексуално ја нападнал. Големата порота во Масачусетс поднела обвинение по две точки за силување, како и за давање алкохол на лице помладо од 21 година. Претходното обвинение поврзано со наводно дрогирање со цел сексуален однос било повлечено и заменето со ново обвинение за силување.
Според полициските записи, девојката изјавила дека го запознала Питерс преку Инстаграм и дека тој ѝ понудил пари за да учествува во неговите видеа на интернет. Таа навела дека на 23 мај 2025 година била во семејниот дом на инфлуенсерот во Чатам, каде што тој наводно ѝ понудил вотка.
Таа тврди дека откако пиела, се опила, а подоцна заспала. Во исказот пред полицијата навела дека следното утро се разбудила додека Питерс имал сексуален однос со неа без нејзина согласност. Питерс, преку своите адвокати, ги негира обвинувањата и тврди дека сексуалниот однос бил доброволен.
Инфлуенсерот претходно се изјаснил за невин по првичните обвиненија и бил пуштен со кауција од 10.000 долари. Со новото обвинение, случајот се префрла во повисокиот суд во округот Барнстабл.
Клавикулар е познат по промовирање на трендот „looksmaxxing“, кој опфаќа различни методи за подобрување на физичкиот изглед. Неговите содржини најчесто вклучуваат оценување на изгледот на луѓето, како и разговори за естетски процедури и други екстремни начини за менување на надворешниот изглед.
Случајот привлече големо внимание во американската јавност, а судската постапка продолжува.


