Приказната на Турчинот Ибрахим Јуџел стана предмет на интерес откако тој одлучи да се откаже од пушењето на необичен начин.
Во моментот кога имал 42 години, Јуџел пушел по две кутии цигари дневно во текот на 26 години. Откако неуспешно се обидувал неколку пати да ја прекине зависноста, тој донел драстична одлука. Понатамошен поттик претставувала смртта на неговиот татко, кој починал од рак на белите дробови поврзан со пушењето.
Инспирирајќи се од мотоциклистички шлем, Јуџел создаде метален кафез од бакарна жица, кој го покриваше неговата глава. Кафезот имал две брави, а клучевите ги доверил на својата сопруга и ќерка, за да не може сам да се отклучи кога ќе почувствува желба за цигара.
Отворите на кафезот му овозможувале да пие со сламка, но не и да пуши. Според неговите изјави, во првите два дена по почетокот на користењето на кафезот, не запалил ниту една цигара.
Јуџел објаснил дека многупати се обидел да се откаже од пушењето, но секогаш се враќал на старата навика. Со иновацијата, тој имал за цел да си оневозможи физички пристап до цигарите и конечно да ја победи зависноста.
