Во тешка сообраќајна несреќа во округот Килдер, Ирска, загинаа пет млади лица. Тие се наоѓале во автомобил кој се движел во спротивна насока на автопатот М9, при што се судри со друго возило.
Несреќата се случила во раните утрински часови, откако полицијата добила дојава за маскирани лица кои наводно се обидувале да провалат во автомобили. Полицијата го забележала автомобилот „БМВ“ како се движи во спротивната лента и, наместо да започне директна потера, била преземена мерка за негово запирање. За жал, пред возилото да биде запрено, дојде до смртоносниот судир со „Хјундаи“.
На местото на несреќата починаа сите пет лица од „БМВ“-то, додека во другото возило се наоѓале три жени и седумгодишно дете, кои биле пренесени во болница со сериозни повреди.
Овој трагичен настан повторно отвора дебата за „joyriding“, практиката на крадење автомобили за адреналинско искуство и ризично возење. Ирските власти веќе неколку години предупредуваат дека дел од младите ги снимаат овие активности и ги спodelуваат на социјалните мрежи.
Во јавноста се споменува и групата „Lucky Dip Gang“, поврзана со кражби на автомобили и други криминални дела, иако засега не е потврдено дали загинатите биле нејзини членови. Овој аспект се разгледува во текот на истрагата.
Несреќата предизвика силни реакции во Ирска, повторно поставувајќи го прашањето за малолетничкиот криминал, опасното возење и влијанието на социјалните мрежи.
Истрагата за околностите около трагичниот судир продолжува.
