По девет дена поминати под земја, двајца работници беа спасени живи од тунелот на хидроенергетскиот проект „Upper Trishuli 3A“ во Непал.
Санџај Сах, механички надзорник од 30 години, и Кабир Махарџан, механички супервизор, беа заробени во тунелот откако на 26 август голема количина вода, мраз, карпи и нанос го погодиле пределот околу хидроцентралата.
Спасувачите неколку дена се обидувале да го пронајдат пристапот до тунелот, бидејќи влезот беше затрупан со околу 170 метри кал, карпи и отпад. Користејќи стари карти, сателитски снимки и други податоци, тимовите ја утврдиле локацијата, а потоа со тежок машини и контролирани експлозии постепено го расчистувале патот.
Во петокот, спасувачите конечно слушнале гласови од длабочината на тунелот. Набрзо успеале да стигнат до двајцата работници и да ги извлечат на површина. Снимките од спасувањето покажуваат како едниот работник е изнесен на грб од спасувач, додека другиот е пренесен на носилка.
Потресна е приказната на Сах, кој им раскажал на спасувачите дека останал за да им помогне на своите колеги во моментот на опасност од водата. Во целосна темнина поминал девет дена, обидувајќи се да остане смирен и да ја задржи надежта.
Двајцата преживеани беа пренесени со хеликоптер во болница во Катманду. Сах е во стабилна состојба, додека Махарџан има потешки повреди и при прегледот не можел да ги движи рацете и нозете.
Спасувањето донесе голема надеж, но потрагата продолжува. Стотици луѓе и натаму се водат како исчезнати, а спасувачките екипи веруваат дека дел од работниците би можеле да бидат живи и заробени во други тунели долж реката Тришули.
