Во Гдањск, Полска, се случи драматична железничка несреќа кога воз удри во камион заглавен на железнички премин. Инцидентот се одвивал на 3 септември, блиску до станицата Гдањск Липце, а возот бил на релација Гдиња–Зелона Гура со околу 250 патници.
Безбедносните камери го забележале моментот пред судирот, при што се гледа дека камионот се наоѓа на преминот кога рампите започнуваат да се спуштаат. Возачот на камионот се обидел да го извлече возилото, но не успеал навреме да ја напушти пругата.
Во критичен момент, близу камионот пристапил човек кој му указал на возачот да продолжи напред и да ја скрши рампата, но неговата реакција била предоцна. Возот со голема сила удрил во приколката.
Машиновозачот бил пренесен во болница, но возачот на камионот и патниците во возот не претрпеле повреди. Возот останал на шините.
Поради несреќата, железничкиот сообраќај на делницата бил прекинат, а патниците биле евакуирани и пренасочени со автобус. Подоцна, сообраќајот бил нормализиран. Полските железници упатија апел до возачите да ја напуштат патеката ако останат заглавени меѓу спуштените рампи, дури и со кршење на рампата, со цел да се осигура безбедноста.
