По речиси три децении, е постигнат значаен напредок во еден од најпознатите нерешени случаи во музичката историја. Дуeјн „Кефи Ди“ Дејвис, поранешен лидер на бандата „South Side Compton Crips“, беше прогласен за виновен за убиството на легендарниот рапер Тупак Шакур.
Поротата во Лас Вегас донела одлука по само неколку часа разгледување на доказите. Дејвис е првиот осуден во случајот за смртта на Тупак, осуден за убиство од прв степен со употреба на смртоносно оружје.
Иако Дејвис не бил обвинет дека лично стрелал во Тупак, обвинителството тврди дека тој го организирал нападот и обезбедил оружје. Мотивот за нападот, според обвинителите, бил одмазда за конфликтот што се случил во хотелот „MGM Grand“ во Лас Вегас. Тупак бил вмешан во физичка пресметка со Орландо Андерсон, внукот на Дејвис.
На 7 септември 1996 година, Тупак бил во автомобил со Марион „Суге“ Најт кога на нив било пукано од друг автомобил во Лас Вегас. Раперот бил погоден и починал шест дена потоа, на само 25 години. Случајот со години остана нерешен и предизвика многу шпекулации и теории.
Клучен доказ во обвинителскиот случај биле изјавите на Дејвис, кој во текот на годините зборуваше за својата улога во нападот. Во своите мемоари од 2019 година, направил детално објаснување за настаните. Обвинителството ги искористило овие изјави за да докаже дека Дејвис имал значајна улога во организирањето на нападот.
Одбраната, пак, тврдела дека неговите изјави биле сосема претерувани или измислени со цел привлекување внимание и заработка. Адвокатите исто така укажувале на недостатокот на директни докази што го поврзуваат Дејвис со пукањето. Сепак, поротата не ги прифатила нивните аргументи и донела осудителна пресуда.
Дејвис сега може да се соочи со доживотна затворска казна без условен отпуст. Изрекувањето на казната е планирано за 13 октомври, а неговата одбрана најави жалба на пресудата.
Оваа пресуда е историски момент за случајот кој 30 години беше опкружен со мистерија. Смртта на Тупак Шакур остана една од најголемите загатки во хип-хоп културата, а неговото убиство со децении предизвикуваше многу шпекулации за тоа кој стоел зад нападот.
