По две незаборавни вечери исполнети со музика и емоции, заврши 33. издание на Интернационалниот музички фестивал „Охрид Фест – Охридски трубадури“. Овој фестивал, кој е симбол на најголемиот летен музички настан во Македонија, повторно потврди зошто во текот на повеќе од три децении привлекува внимание од регионот.
Фестивалот започна со традиционалната Фолк вечер, на која беа промовирани нови композиции инспирирани од македонската музичка традиција. Публиката уживаше во настапите на познати музички имиња, но и на новата генерација таленти. Победник на Фолк вечерта стана Анета Љумаковска со „Срцево те бендиса“, додека Бобан Зафировски и Петар Нечовски освоија второ и трето место со своите песни.
Стручниот жири ги прогласи победниците во различни категории, а најдобра композиција стана „Нема вино што болката ја лечи“ на Милован Секуловски и Група Сарај. Наградата за најдобар дебитант ја освои Ангела Влинтовска, а признанието за интерпретација му припадна на Блага Петреска.
Втората вечер на фестивалот беше во знакот на современиот поп звук, а победник според гласовите на публиката стана Милан Бујаковиќ со „Срце лава“. Стручното жири највисоко ја оцени композицијата „Дур постојам“ на Стефан Спироски, кој доби и награда за најдобра интерпретација.
Посебен момент на фестивалот беше признанието за 50 години успешна телевизиска кариера на легендарната Сузана Манчиќ. По завршувањето на фестивалот, организаторите повторно потврдија дека нивната мисија останува создавање нови песни и откривање нови музички таленти.
