Во Ватикан се одржа неочекувана средба помеѓу легендарниот музичар Боб Дилан и папата Лав XIV. Фотографиите од оваа средба станаа хит на социјалните мрежи и во глобалните медиуми.
Особено привлекуваше внимание стилот на 85-годишниот Дилан, кој се појави во црн дуксер со качулка, комбиниран со црна јакна, капа и ракавици. Под дуксерот носеше кошула со лабаво врзана вратоврска, што создаде необичен изглед за таква значајна средба. За разлика од него, папата Лав XIV беше облечен во својата позната бела одежда, што создаде интересен контраст во нивните стајлинзи.
Средбата не беше само формалност, бидејќи двајцата размениле и подароци. Папата му подарил на Дилан бројаница, додека Дилан му ја предал својата автобиографија „Chronicles: Volume One“.
Средбата носеше и значајна музичка симболика, со оглед на тоа што папата во предговорот на книга за разоружување се повикал на стихови од песната „Go Away You Bomb“, која Дилан ја напиша во 1963 година и која носи антивоена порака. Иако никогаш не била објавена на албум, песната има значајно влијание.
Дилан, кој доби Нобелова награда за литература во 2016 година, моментално е во Италија на европскиот дел од својата турнеја „Rough and Rowdy Ways“, со концерт во Рим закажан за 5 ноември. Оваа средба не е прва за Дилан со поглавар на Католичката црква, бидејќи во 1997 година настапил пред папата Јован Павле II во Болоња.
