НАСА објави фотографии од два големи астероиди кои прелетале блиску до Земјата

Минатата недела се случи редок настан – не еден, туку два големи астероиди прелетаа покрај Земјата доволно блиску за научниците да ги снимат.

Ниту 2024 MK ниту 2011 UL21, како што беа именувани астероидите, не беа доволно блиску за да претставуваат закана, но и двете беа доволно блиску во радарскиот опсег што НАСА „испука“ неколку фотографии.

Фотографиите претставуваат многу повеќе од сувенири, бидејќи научниците можат да ги проучуваат за да ги разберат својствата на карпите кои можат да се најдат во близина на Земјата, пренесува rts.rs.

Тие информации можат да му помогнат на човештвото да подготви стратегии против идните астероиди кои би можеле да станат закана за Земјата.

Нашиот агол од Сончевиот систем е главно празен, но не целосно. Повремено, комета или астероид лета додека орбитира околу Сонцето.

Огромното мнозинство од нив нема да биде проблем. Сепак, сè што лета на одредено растојание од Земјата е класифицирано како потенцијално опасно.

Двајцата неодамнешни посетители спаѓаат во таа категорија – 2011 UL21 прелета покрај Земјата на 27 јуни на растојание од 6,6 милиони километри, околу 17 пати повеќе од растојанието помеѓу Земјата и Месечината.

Два дена подоцна се појави 2024 МК и прелета исклучително блиску – 295.000 километри. Тоа е само три четвртини од растојанието помеѓу Земјата и Месечината.

Снимањето на такви објекти не е многу лесно, дури и кога тие се релативно блиску и класифицирани како „големи“ астероиди. Во споредба со огромните димензии на небото што се снимаат, тие се прилично мали и не премногу светли.

Затоа се користат големи радарски телескопи за испраќање бранови во вселената и примање сигнали назад од кои астрономите собираат фотографии.

Бидејќи 2024 MK беше многу поблиску – такво блиско прелетување се случува еднаш на неколку децении – научниците можеа да добијат многу подетални фотографии.

НАСА користеше еден телескоп за да испрати радио бранови, а друг за да ги прими, што резултираше со фотографии од астероидот кои ја покажуваат не само формата, туку и испакнатините, карпите и гребените.

Со пречник од 150 метри и издолжена форма, откриен е дури на 16 јуни, а неговата орбитална патека ја смени Земјината гравитација. Затоа, набљудувањата им овозможуваат на научниците да проценат како ќе се однесува 2024 МК во иднина.

Според сите проценки, во иднина нема да претставува закана за Земјата.