Стивен Тајлер трајно ги оштетил гласните жици, Аеросмит ја откажа турнејата

Музичката група Aerosmith повеќе нема да гостува, бидејќи гласот на фронтменот Стивен Тајлер е трајно оштетен откако во септември минатата година ги повреди гласните жици.

„Тој со месеци неуморно работеше за да си го врати гласот. И покрај тоа што работеше со најдобрите медицински тимови, видовме како се мачи. Јасно е дека целосно закрепнување на гласот не е можно“, се наведува во соопштението на групата, пренесува Ројтерс.

Тајлер минатиот септември објави дека ги повредил гласните жици за време на турнејата Peace Out: The Farewell. Тој тогаш изјави дека повредата на гласните жици предизвикала крварење и дека се надева дека бендот повторно ќе настапи.

Покрај Тајлер, членови на бендот се Џо Пери, Бред Витфорд, Том Хамилтон и Џои Крамер.