Животни: Најреткиот вид мачки повеќе не е на работ на истребување, велат научниците

Еден од најретките видови мачки во светот, пиринејскиот рис, повеќе не е во групата на загрозени животни, објави Меѓународната унија за зачувување на природата (IUCN).

Организацијата ги класифицира видовите според нивото на ризик што им се заканува.

Пиринејскиот рис премина од загрозена во ранлива категорија на „црвената листа“, бидејќи нивниот број значително е зголемен.

Популацијата на пиринејскиот рис се зголеми речиси 10 пати од 2001 до 2022 година.

IUCN пишува дека сега има повеќе од 2.000 млади и зрели рисови.

Овој тип на мачка го добил името по Пиринејскиот Полуостров (Шпанија и Португалија) каде што најмногу се среќава.

Според последниот попис, 13 кластери биле во Португалија и еден во Шпанија.

Дивата мачка порано била вообичаена низ Пиринејскиот Полуостров, но од 1960-тите бројот на единки се намалува.

Губењето на живеалиштата, ловокрадството и сообраќајните несреќи придонесоа овој вид да биде доведен на работ на истребување.

Тоа сега се менува.

Напорите да се зачува неговиот главен извор на храна – дивиот зајак, познат и како европски, уште еден од позагрозените видови – одигра голема улога во зголемувањето на популацијата на овој вид.

Програмите за ослободување на стотици заробени рисови, како и обновувањето на грмушките и шумите, исто така придонесоа да се осигура дека овие диви мачки повеќе не се загрозени.

Франциско Хавиер Салседо Ортиз, координатор на програмата за нивно зачувување, рече дека ова е „најголемото закрепнување на видот на мачки што некогаш било постигнато на овој начин“.

Тој додаде дека има уште „многу работа за да се осигура дека животните ќе преживеат и закрепнат“.

„Постојат планови за повторно воведување на пиринејскиот рис на нови места во централна и северна Шпанија во иднина“, рече тој.

Според IUCN, областа на која живеат овие диви мачки сега е значително поголема: од 449 километри во 2005 година на 3.200 километри денес.

Но, оваа организација предупредува дека ситуацијата може да се промени.

Најголеми закани се болестите на дивите мачки и зајаци, со кои се храни пиринејскиот рис, но и ловокрадството и сообраќајните несреќи.

Црвената листа на IUCN, формирана во 1964 година, би можела да стане најсеопфатниот извор на информации во светот за глобалниот статус на зачувување на животните, габите и растенијата.