Британската пејачка Оливија Дин се нашла во центарот на правен конфликт откако издавачката куќа која го управува каталогот на покојниот Бил Витерс поднесе тужба, тврдејќи дека нејзината песна „I’ve Seen It“ содржи елементи од неговиот познат хит „Just the Two of Us“.
Тужбата е иницирана во федералниот суд во Лос Анџелес, а во неа се истакнува дека сличностите меѓу двете композиции се „евидентни и неизбежни“. Според тужителот, ангажиран музиколог открил „значајни сличности“, вклучувајќи повторно користење на препознатливата мелодија од песната на Витерс.
Треба да се напомене дека Дин не е лично тужена, ниту нејзините коавтори Бастијан Лангебек и Макс Волфганг. Тужени од страна се нејзината издавачка куќа Capitol Records, Universal Music Group и компании поврзани со правата на издавање.
Издавачот на Витерс укажува дека на 17 август ги информирале засегнатите страни за наводното прекршување на авторските права, но песната продолжила да се дистрибуира и лиценцира.
„I’ve Seen It“ е завршната песна од албумот „The Art of Loving“, кој излезе во 2025 година. Албумот донесе значителен успех за Дин, која годинава ја освои наградата Греми за најдобар нов изведувач.
Од друга страна, „Just the Two of Us“ е хитот на Гровер Вашингтон Џуниор со вокалите на Бил Витерс, објавен во 1981 година. Песната стигна до второто место на Billboard Hot 100 во Америка и освои Греми за најдобра R&B песна.
Засега нема судска пресуда која би потврдила дека навистина се работи за плагијат. Претставниците на Universal Music Group и Оливија Дин сè уште не реагирале јавно во врска со тужбата.
