Тажни вести доаѓаат од Шпанија, каде што фудбалерот на ЦД Тенерифе, Хесус де Мигел, почина во својата 30-та година, само еден ден по сериозниот инцидент за време на натпреварот против ФК Андора.
Несреќата се случила на 2 ноември, во последните моменти од натпреварот во шпанската втора лига. Де Мигел, во обид да започне контранапад, се судрил со голманот на Андора, Хесус Овоно, кој силно го удрил во градите со коленото. Фудбалерот по ударот паднал на теренот и останал неподвижен.
Веднаш бил повикан медицински тим, а по првичната помош на теренот, го пренеле во болница. За време на транспортот, тој доживеал кардиореспираторен застој, но лекарите успеале да му го обноват пулсот. Сепак, неговата здравствена состојба се влошила во интензивната нега.
Натпреварот бил прекинат со резултат 2:2, а голманот Овоно добил директен црвен картон по инцидентот. Во изјавата од ЦД Тенерифе, клубот со жалење ја потврди смртта на Де Мигел и изрази сочувство до неговото семејство и пријатели. Го повикаа јавноста да ја почитува приватноста на семејството во овие тешки моменти.
Неговата смрт предизвика големи реакции и пораки на сочувство од разни фудбалски клубови и спортски организации низ цела Шпанија. Фудбалската заедница денеска е во жал по загубата на овој млад напаѓач.
