Инфлуенсерката и професорка Калтрина Криезиу се обрати на социјалните мрежи по големите реакции кои произлегоа од нејзината изјава за носење фалсификувана гардероба во интервју за Хајп Македонија.
На прашањето дали оправдува фалсификувана облека, Калтрина одговори дека не го поддржува тоа, што предизвика значителна лавина коментари на социјалните платформи.
По бројните реакции, таа реши дополнително да ја ублажи ситуацијата на Инстаграм, нагласувајќи дека нејзината намера не била да навреди некого.
„Мој личен избор е да не носам фејк брендирана облека, бидејќи сметам дека фалсификатите го копираат идентитетот и интелектуалната сопственост на дизајнерите“, изјави Калтрина.
Таа истакна дека нема ништо срамно во тоа човек да не може да си дозволи луксуз, но не смета дека треба да се претставува некој како способен да си дозволи што всушност не може.
Калтрина дополнува дека многу повеќе почитува оние кои носат оригинална и достапна гардероба, отколку оние кои фалсификатите ги претставуваат како вистински дизајнерски парчиња. Сепак, таа нагласи дека не би оценувала некого само според облеката или изгледот.
„Вистинската елеганција се манифестира во вкусот, самодовербата и автентичноста, а не во цената или логото на облеката“, порача таа.
Одговарајќи на коментарите, Калтрина им порача на оние кои ја мешаат темата за фалсификувана гардероба со естетски интервенции, дека нејзината изјава не била напад кон никого.
На крајот, таа нагласи дека секој има право на свое мислење и дека различностите не треба да создаваат навреди.
„Различното мислење не е напад, а несогласувањето не е оправдување за навреди“, заврши Калтрина.
