Американската вселенска агенција НАСА објави конкурс за нова генерација астронаути и им нуди можност на избраните кандидати да учествуваат во идни вселенски мисии, меѓу кои и задачи поврзани со Месечината. На конкурсот можат да се пријават американски државјани, а крајниот рок за пријавување е 3 декември 2026 година.
Според објавата на американскиот портал USAJOBS, се отвораат неколку работни места во Вселенскиот центар „Џонсон“ во Хјустон, Тексас. Годишната плата изнесува 164.395 долари, а работата опфаќа и интензивна подготовка за идни вселенски експедиции.
Од НАСА наведуваат дека новите астронаути ќе имаат значајна улога во американските планови за враќање на Месечината, воспоставување долгорочно човечко присуство на нејзината површина и подготовка на идните мисии кон Марс. Администраторот на НАСА, Џаред Ајзакман, изјави дека избраните кандидати би можеле да стапнат на Месечината, да живеат и да работат во месечева база и да помогнат во развојот на системите и операциите што подоцна ќе ги однесат екипажите на Марс.
Иако конкурсот е отворен само за американски државјани, условите се многу строги. Кандидатите мора да исполнат најмалку еден од бараните образовни критериуми: магистерска диплома по инженерство, биолошки науки, физички науки, компјутерски науки или математика; најмалку две академски години докторски студии во соодветна област; соодветна медицинска диплома; или завршена програма за тест-пилоти.
Покрај образованието, потребно е и соодветно професионално искуство. За повеќето пријавени се бараат најмалку три години соодветна работа по завршувањето на студиите, а за пилотите важат посебни правила поврзани со бројот на часови во лет.
Кандидатите со искуство како пилоти на млазни авиони со високи перформанси мора да имаат најмалку 750 часа како пилоти-команданти. За другите летала со фиксни крила се бараат 1.500 часа, од кои 750 како команданти. За пилотите на хеликоптери се потребни 1.000 часа лет, од кои 300 како команданти.
Избраните кандидати нема веднаш да заминат во вселената. Прво ги очекува околу двегодишна обука, на која ќе учат за управување со вселенски летала, роботика, активности надвор од леталото, тимска работа и други неопходни вештини.
НАСА предупредува дека работата бара подготвеност за многу напорни услови, долготрајна изолација и престој во ограничен простор. Во огласот се наведува и дека идните астронаути мора да бидат подготвени за мисии што би можеле да траат 12 месеци или повеќе.
Сепак, тоа што некој ќе биде избран за астронаут не значи и сигурно патување на Месечината, бидејќи распоредувањето на конкретна мисија зависи од повеќе фактори и не е гарантирано.
Новата селекција доаѓа по историската мисија „Артемис II“, во која четворица астронаути во април 2026 година ја обиколија Месечината и поставија рекорд за најголемо растојание од Земјата што го поминале луѓе. Со оваа нова генерација, НАСА продолжува со подготовките за своите амбициозни планови за иднината на човечкото истражување на вселената.
