Министерството за внатрешни работи упати апел до родителите, старателите, наставниците и целата јавност да бидат особено внимателни поради појавата позната како „764“. Станува збор за насилна интернет-заедница чии членови избираат за цел деца, малолетници и други ранливи лица, со намера да ги манипулираат, да ги заплашуваат и да ги наведуваат на опасни и насилни постапки.
За сериозноста на оваа закана предупредуваат и меѓународни безбедносни институции, меѓу кои и Федералното истражно биро на САД. ФБИ ја поврзува групата „764“ со пошироки нихилистички насилно-екстремистички заедници и со слични групи.
Апелот има превентивна цел, односно навреме да ја информира јавноста за начинот на кој дејствуваат ваквите групи, за ризиците на кои се изложени децата и за можностите за нивна заштита.


