Нови информации од истрагата за тешката авионска несреќа во Мајами откриваат локацијата на жртвите во моментот на трагедијата.
Националниот одбор за безбедност на сообраќајот на САД (NTSB) потврди дека петте жртви биле во двете возила погодени од товарниот авионот „Боинг 767“, кој го управувал „21 Ер“ за „Амазон“.
Авионот при слетувањето ја надминал пистата на меѓународниот аеродром во Мајами и продолжил надвор од аеродромската област. На својот пат удрил во белото комбе „Форд Еконолајн“, во кое имало седум патници, потоа ја пробил оградата и удрил во „Тојота“ која се движела по сообраќајница.
Шефицата на NTSB, Џенифер Хоменди, изјави дека сите пет загинати биле во овие две возила, но не прецизираше колку жртви имало во секое од нив.
Ударот бил толку силен што комбето било целосно уништено. На местото на несреќата останале расфрлани делови од авионот, возилата и аеродромската опрема, а оградата била оштетена. Хоменди местото го опиша како „целосно уништување“.
Во несреќата биле повредени уште пет лица, од кои тројца се во критична состојба. Двајцата членови на екипажот на авионот ја преживеале несреќата.
Истрагата продолжува, а истражителите веќе ги пронашле двете црни кутии – снимачот на податоците од летот и снимачот на разговорите во пилотската кабина, кои ќе бидат анализирани за да се утврди што се случувало пред авионот да ја напушти пистата.
NTSB истражува различни фактори, вклучувајќи ја и брзината на авионот, временските услови, функционирањето на системите, искуството на екипажот и комуникацијата со контролата на летање. Официјален заклучок за причината за несреќата сè уште нема.
