Многу луѓе во токсични љубовни врски знаат дека партнерот ги повредува, ги понижува или манипулира со нив, но сепак не успеваат да ја прекинат врската. Причината не е секогаш недостиг од храброст, туку сложена емоционална поврзаност во која се менуваат болка, страв, надеж и кратки моменти на нежност.
Психологот д-р Ки-Реј Превит од клиниката „Кливленд“ наведува дека во некои насилни врски се повторува циклус со четири фази: зголемување на напнатоста, конфликт или насилен инцидент, помирување и привиден мир.
Обично сè почнува со мали расправии, незадоволство и сè поголема напнатост. Потоа следуваат навреди, понижувања, закани, манипулации, а понекогаш и физичко насилство.
По ваквите случувања, партнерот може да почне да се извинува, да носи подароци, да покажува нежност и да ветува дека истото однесување повеќе нема да се повтори. Тогаш кај другата личност повторно се буди надежта дека врската може да се врати на онаква каква што била на почетокот.
Една од главните причини е емоционалната зависност што се создава со постојаното наизменично менување на лоши и добри периоди. Личноста не ги помни само болните моменти, туку и времињата кога партнерот бил внимателен, грижлив и полн со љубов.
Дополнително, манипулацијата и префрлањето на вината можат да ја наведат жртвата да се сомнева во сопствените чувства и процени, па дури и да поверува дека самата е виновна за проблемите во врската.
Сепак, важно е да се нагласи дека одговорноста за насилството никогаш не е на личноста што го трпи.
Заминувањето од нездрава врска не е секогаш лесна одлука. Некои луѓе стравуваат дека ќе го изгубат домот, финансиската сигурност или вообичаениот секојдневен живот. Други остануваат поради децата, стравот од осаменост или надежта дека партнерот сепак ќе се промени.
Особено тешки се ситуациите кога постои страв од закани, одмазда или насилна реакција по најавата за разделба.
Затоа прашањето „Зошто едноставно не си заминеш?“ може дополнително да ја повреди личноста што веќе минува низ тежок период. Наместо осуда, потребни се разбирање, поддршка и помош за безбедно излегување од таков однос.
Некои од предупредувачките знаци што не треба да се игнорираат се: партнерот постојано ве навредува, ве понижува или ја омаловажува вашата вредност; се обидува да контролира со кого се дружите и како го поминувате времето; ве оддалечува од семејството и пријателите; ве обвинува за сопствените испади и лошо однесување; по секоја расправија ветува дека ќе се промени, но истите ситуации повторно се повторуваат; и се плашите од неговата реакција кога сакате да го кажете своето мислење.
Препознавањето на проблемот е првиот важен чекор. Разговор со блиска личност, психолог или друг стручен работник може да помогне подобро да се разбере ситуацијата и да се најде начин за нејзино надминување.
Доколку постои опасност од насилство, заминувањето треба да се испланира внимателно, со стручна поддршка и со посебно внимание на личната безбедност.
