На 11 ноември се одбележува Денот на самците, познат како „Singles’ Day“, празник што потекнува од Кина и им е посветен на луѓето што не се во љубовна врска. Датумот 11.11 не е избран случајно, бидејќи четирите единици симболично ги претставуваат самците.
Според најпознатата приказна, идејата се појавила во 1993 година меѓу студенти на Универзитетот во Нанџинг. Наместо да го слават Денот на вљубените, тие одлучиле да имаат свој ден посветен на самечкиот живот, со дружења и меѓусебно подарување. Така почнала традицијата што со текот на времето се проширила низ Кина.
Празникот добил ново значење во 2009 година, кога кинеската компанија „Алибаба“ го претворила во голем ден за купување преку интернет. Оттогаш, 11 ноември се развил во еден од најголемите настани за купување во светот, со попусти на облека, технички уреди, козметика и на многу други производи.
Денес овој празник не е само симбол на независноста, туку и можност луѓето да си купат нешто за себе без да чекаат подарок од партнер. Во Кина на овој ден се организираат забави, дружења, а има и средби за запознавање можни партнери.
Она што почнало како студентска идеја за славење на самечкиот живот, со текот на времето се претворило во глобален феномен. Пораката останува едноставна: не мора да сте во врска за да имате причина да се почестите себеси.
