Градоначалникот на Минхен, Доминик Краузе, вчера свечено го отвори традиционалниот Октоберфест, на кој баварскиот премиер Маркус Зедер беше првиот што ја доби криглата пиво.
Капиите на фестивалот се отворија нешто по 9 часот наутро, а редицата пред шаторите за пиво беше долга стотици метри уште од раните утрински часови. Најпосветените посетители одлучија да кампуваат за да обезбедат добри места, додека редарите неколкупати мораа да влијаат за да го контролираат притисокот пред шаторите.
На Октоберфест, во просек, секој посетител пие по еден литар пиво. Според експертот за пиво Штефан Штанг, пивото на фестивалот е посилно од вообичаеното, со екстракт од над 13,5 проценти и над 6 проценти алкохол, според „Билд“.
Цената за литар пиво оваа година привлече големо внимание, со цена од 14,80 до 15,90 евра, што е околу 2,5 отсто поскапо од минатата година.
Оние што сакаат да се запознаат со традиционалните баварски носии можат да го посетат „Оиде Визн“, каде што посетителите најчесто пијат пиво од специјални керамички кригли. Влезот чини 4 евра, а за деца до 14 години е бесплатен. По 21 часот, влезот е бесплатен за сите.
Нова атракција годинава е „Хаотично нишало“, конструкција висока 42 метри. Исто така, за прв пат се снима и „романтична комедија“ за „Нетфликс“, за што биле побарани 4.000 статисти. Ова е 191. издание на Октоберфест, кој ќе трае до 4 октомври. Минатата година, поради големиот број посетители, неколку пати беше ограничен пристапот до фестивалот.
