Џон Д. „Џеј“ Рокфелер IV, поранешен американски сенатор и гувернер на Западна Вирџинија, почина во својот дом во Вашингтон на 89-годишна возраст.
Неговата смрт беше објавена на 6 ноември, а причината засега не е позната. Рокфелер беше правнук на познатиот индустријалец Џон Д. Рокфелер, основач на нафтената компанија „Стандард Оил“.
Иако потекнуваше од влијателно семејство, Џеј Рокфелер својот професионален пат го започна во Западна Вирџинија, каде што во 1964 година се преселил како волонтер за помош на сиромашните, а ова искуство му помогнало во неговата политичка кариера.
Во текот на своето време во Сенатот, Рокфелер активно се залагаше за подобрување на здравствената заштита, особено за деца од семејства во финансиски тешкотии, и беше клучен во создавањето на програмата за здравствено осигурување на деца, усвоена во 1997 година.
Тој исто така работеше на прашања поврзани со правата на воените ветерани, заштитата на потрошувачите, безбедноста на рударите и развојот на интернет-инфраструктурата, а во еден момент ја предводеше Комисијата за разузнавање на американскиот Сенат.
По него остануваат сопругата Шерон, со која беше во брак скоро 60 години, четирите деца и деветте внуци. Со неговата смрт се затвора важна страница од животот на семејството Рокфелер, кое остави длабок печат во американскиот јавен живот.
