Денес, 24 септември, православните верници ја слават Света преподобна Теодора Александриска, која во црковната историја останала позната како искрена покајничка.
Според нејзиното житије, Теодора била жена од Александрија и сопруга на млад маж. По совет на една бајачка, направила прељуба, по што длабоко се покајала за својот грев. Исекла ја косата, облекла се во машки оделја и заминала во манастирот Октодекат, каде што живеела под името Теодор.
Со тоа што се посветила на пост, молитва, бдеење, смирение и покајание, Теодора добила голема почит од монасите. Меѓутоа, нејзиниот живот повторно бил ставен на искушение по клевета од една жена, која ја обвинила дека ја обесчестила и дека таа останала бремена од неа. Наместо да се брани, Теодора го прифатила обвинението како казна за своите порани гревови.
Поради тоа, била протерана од манастирот и следните седум години поминала во шуми и пустини, грижејќи се дури и за детето на жената која ја наклеветила.
По седум години, игуменот повторно ја примил во манастирот, каде што живеела уште две години пред својата смрт.
Најзначаен пресврт се случил по нејзината смрт, кога монасите откриле дека Теодор всушност била жена. Според житието, ангел му ја открил вистината на игуменот.
Во црковната традиција, Света Теодора се споменува и по својата духовна моќ, со раскази дека скротувала ѕверови, исцелувала болни и дури извела вода од сув бунар.
Таа се упокоила во 490 година, а нејзиниот живот останал запаметен како пример за искрено и истрајно покајание во православната традиција.
