Првите резултати од пациент што ја примил персонализираната руска вакцина против рак привлекоа големо внимание. По завршувањето на терапијата со препаратот „Неонковак“, кај пациентот со меланом повеќе не биле забележани метастази, а во последните четири месеци не се појавиле ниту нови туморски промени.
Информацијата ја соопшти Александар Гинзбург, научен директор на Националниот истражувачки центар „Гамалеја“, а ја пренесе руската новинска агенција ТАСС.
Сепак, Гинзбург предупреди дека овие наоди не значат дека пациентот е целосно излекуван. Според него, за да се зборува за трајно излекување од рак, потребно е следење во период од најмалку пет години. Засега набљудувањето трае само неколку месеци, па лекарите продолжуваат внимателно да ја следат неговата здравствена состојба.
„Неонковак“ е персонализирана вакцина заснована врз технологија на mRNA. За разлика од класичните вакцини, таа не служи за спречување инфекција, туку за поттикнување на имунолошкиот систем да ги препознае и да ги нападне клетките на ракот.
Посебноста на овој пристап е во тоа што вакцината се изработува по мерка за секој пациент, врз основа на молекуларно-генетските особености на неговиот тумор. На тој начин се издвојуваат специфични туморски антигени, односно обележја што им помагаат на имунолошките клетки да ја препознаат малигната болест.
Терапијата се спроведува во неколку фази и вклучува вкупно до десет примени. Првите три дози се даваат во текот на првите две недели, а потоа вакцината се прима на секои 21 ден.
Овој прв случај се смета за охрабрувачки сигнал за понатамошниот развој на персонализираните терапии против рак. Но научниците нагласуваат дека се потребни уште многу време и следење на поголем број пациенти за да се утврди колку е методот ефикасен на долг рок.
Иако исчезнувањето на метастазите е значаен резултат, медицинските експерти засега не зборуваат за победа над ракот, туку за почетни наоди што допрва треба да се потврдат.
