Една од највпечатливите историски драгоцености поврзани со семејството Романови достигна цена од речиси пет милиони долари на аукција во Женева. Станува збор за раскошна нараквица со голем сафир, продадена од „Сотби“ за 4.122.000 швајцарски франци, што е околу 4,9 милиони американски долари.
Пред наддавањето, организаторите ја проценија на меѓу 850.000 и 1,7 милион франци, па конечната цена значително ги надмина очекувањата. Новиот сопственик е приватен колекционер, чиј идентитет не е објавен, јави „Асошиејтед прес“.
Во центарот на нараквицата е исклучително редок цејлонски сафир од 197,80 карати. Каменот потекнува од 19 век и е поврзан со колекцијата на руското царско семејство Романови.
Според податоците на аукциската куќа, сафирот најверојатно првично дошол од поранешната Могулска Империја во Јужна Азија, а во текот на 19 век станал дел од руските царски драгоцености.
Неговата историска вредност дополнително се зголемува затоа што го носела царицата Марија Фјодоровна, сопруга на царот Александар III и мајка на последниот руски цар Николај II. Таа ја носела на балот во Зимската палата во 1903 година, настан што се смета за еден од последните големи раскошни спектакли на царска Русија.
По Руската револуција, судбината на сафирот се променила. Тој бил евидентиран во пописот на царското богатство, а потоа завршил меѓу драгоценостите што советската власт ги продавала за време на распродажбата на царските богатства.
Во 1927 година го купила оперската пејачка и колекционерка Гана Валска, и тоа преку куќата „Картие“. Во подоцнежните децении повторно се појавувал на аукции, а околу 2015 година бил вграден во сегашната платинска нараквица украсена со дијаманти.
Комбинацијата од големината, реткоста и историското потекло го направи овој предмет еден од највпечатливите на аукцијата во Женева. Продажбата уште еднаш покажа дека драгоценостите со документирана врска со европските кралски семејства можат да достигнат исклучително високи цени.
