Неверојатен медицински успех доаѓа од Грција, каде 54-годишна жена стана мајка на здраво девојче, користејќи ембрион кој бил замрзнат пред повеќе од две децении.
Ембрионот, од 2004 година, бил дел од ин витро постапка и бил чуван повеќе од 22 години. Неговиот пренос во матката се случил во декември 2025 година, а жената успешно ја изнела бременоста.
Девојчето е родено во 39-та недела, со тежина од 3.490 грама. Лекарите го оценуваат овој случај како исклучителен, особено поради долгиот период на криопрезервација на ембрионот.
Приказната има и длабока емотивна позадина. Истиот метод за ин витро оплодување, жената го користела и во 2004 година за да го добие својот син, кој на жалост починал во сообраќајна несреќа во октомври 2025 година, на 21-годишна возраст.
Неколку месеци по трагичниот настан, семејството решило да ја искористи шансата со замрзнатиот ембрион. Така, во нивниот живот се појавила новата радост – девојчето кое им носи спомен на нејзиниот трагично починат брат.
Според лекарите, овој случај е еден од најдолгите документирани периоди на замрзнат ембрион кој резултирал со успешно раѓање.
Приказната предизвика големо внимание во јавноста и повторно отвори дискусија околу можностите на современата медицина, како и за емотивните одлуки што семејствата мораат да ги донесат во вакви ситуации.
