Јапонски истражувачи развиваат нова експериментална вакцина која би можела да помогне во елиминирање на “зомби” клетки, старечки клетки кои ја губат способноста за делба, но продолжуваат да бидат активни во телото, создавајќи воспаленија и здравствени проблеми поврзани со стареењето.
Проектот го води професорот Тору Минамино од Универзитетот “Џунтендо” во Јапонија. Резултатите од експериментите на глувци се охрабрувачки, но истражувањето е во почетна фаза.
Сенесцентните клетки, или старечки клетки, не умираат, туку остануваат во ткивата, истовремено испуштајќи молекули кои негативно влијаат на соседните клетки. Њиховото нагласено присуство може да предизвика хронични воспаленија, оштетување на ткивата и разни заболувања поврзани со стареење.
Тимот од Јапонија идентификувал протеин присутен во поголеми количества на старечките клетки. На основа на него, развиена е пептидна вакцина која има за цел да го стимулира имунолошкиот систем.
Антителата создадени по вакцинацијата би требало да ги препознаат старечките клетки, овозможувајќи на имунолошките клетки полесно да ги локализираат и уништат.
По примената на вакцината, кај глувците е забележано значително намалување на старечките клетки, особено во ткивата со проблеми со крвните садови. Научниците веруваат дека ваков пристап би можел да има значајна улога во третманот на одредени болести поврзани со стареењето, како што се артериската вкочанетост и дијабетесот.
Меѓутоа, важно е да се напомене дека не се пронајдени методи за забавување на стареењето. Разликата помеѓу успешен тест на глувци и ефикасна терапија за луѓе е огромна, а пред ваквото решение да биде тестирано на луѓе, неопходно е да се утврдат безбедноста и ефикасноста, како и можните несакани ефекти.
Истражувањето во областа на сенолитици, терапија за елиминација на старечките клетки, предизвика значаен интерес последниве години. Главната цел на научниците не е да овозможат бесконечен живот, туку да помогнат луѓето да останат здрави и функционални подолго, избегнувајќи болести кои често се јавуваат со стареењето.
Сегашната “зомби вакцина” останува во експериментална фаза, без докази дека може да го запре или врати стареењето кај луѓето. Сепак, резултатите поттикнуваат интересна дискусија: дали можеби отстранувањето на “зомби” клетките може некогаш да помогне во забавување на процесот на стареење?
