Анализа на податоци од САД открива интересна врска помеѓу професијата и стапката на развод. Според истражувањето на American Community Survey, некои занимања имаат повисок процент на разведени од другите.
На врвот на оваа листа се наоѓаат неколку професии, при што стапката на разводи се движи близу 50 проценти. Телемаркетерите се со стапка од 48 проценти, а зад нив се масерите со 47,9 проценти.
Третата позиција ја заземаат возачите на автобуси со стапка од 47,8 проценти, а високо на листата се и надзорниците во затворите со 47,5 проценти. Возачите и придружниците на возила за итна помош имаат стапка од 47,3 проценти.
Во поширокиот список се дополнително наоѓаат професии со стапка на разведени лица над 45 проценти, како што се психијатриските негуватели, практичните медицински сестри, работниците во казина, келнерите и работниците во обезбедување.
На спротивната страна, во професии со значително помал удел на разведени, најниска стапка е забележана кај актуарите (14,2 проценти), а следуваат физичарите и физичките научници (17,2 проценти), ИТ научниците (18,7 проценти) и програмерите (18,9 проценти).
Во оваа група се исто така и физиотерапевти, лекари, свештени лица, фармацевти, атмосферски научници и инженери од нафтената и рударската индустрија.
Според анализата, просекот на разводи помеѓу 20-те професии со највисока стапка е околу 46,8 проценти, додека кај 20-те со најниска стапка, просекот е околу 20,1 процент.
Сепак, овие бројки не значат дека конкретната професија е единствена причина за разводите. Претходни истражувања сугерираат дека фактори како работното време, доходот, условите за работа, како и личните и демографските карактеристики, можат да влијаат на ризикот од развод.
