Мексиканската Национална гарда се прошири со нов член, кој е еден од најнеобичните! Неговото име е Командо, а тој е 13-месечна чивава која стана вистинска интернет-сензација со својата минијатурна тактичка опрема.
Со тежина од околу 7 килограми и височина од само 21 сантиметар, Командо не заостанува во тренинзите со многу поголемите службени кучиња.
За него е специјално изработена опрема, вклучувајќи тактички елек, заштитни очила, шлем и мали камери поставени на неговата глава. Снимките од неговиот тренинг во Мексико Сити ја покажуваат неговата вештина во пречките и качувањето по скали, додека е опколен од поголеми кучешки колеги.
Командо е вдомен од Националната гарда пред околу шест месеци, откако неговите претходни сопственици, постара двојка, не можеле да се грижат за него.
Иако е дел од единицата, неговите задачи не се класични оперативни, туку тој е обучен за пребарување и спасување, а најголемо внимание му е посветено на контактот со граѓаните.
Малата чивава ги придружува припадниците на Националната гарда на различни граѓански настани, училишни саеми и активности во заедницата. Според потполковничката Дебора Ернандез, неговата мала големина им овозможува на граѓаните полесно да се обратат до униформираните лица и да го погалат.
Командо веќе знае основни команди за послушност и учествувал на парадата по повод Денот на независноста на Мексико. Во редовите на Националната гарда има околу 350 службени кучиња, главно раси како белгиски овчар, германски овчар, холандски овчар и лабрадор, а Командо е вистински исклучок.
Неговата појава на социјалните мрежи привлекува огромно внимание, а тој веќе доби и сопствена анимирана верзија, заедно со многу мемиња. И покрај неговиот мал раст, Командо покажува дека и најмалите членови на единицата можат да направат голем впечаток!
