На 104-годишна возраст почина Соланж Александре, Французинката чија храброст и саможртва оставија длабока трага во историјата на францускиот отпор за време на Втората светска војна.
Нејзината борба против нацистичката окупација започнала кога имала само 19 години, кога им се приклучила на отпорниците и работела како курир, носејќи важни пораки и информации за луѓето што им се спротивставувале на германските сили.
Под кодното име „Корлеј“, таа се движела со велосипед од едно до друго место, изложувајќи се на голем ризик за да помогне во ослободувањето на Франција.
Во 1944 година, заедно со својот иден сопруг, формирала сопствена отпорничка група со околу 30 борци. Таа група учествувала во саботажи, помагала при спасувањето сојузнички пилоти и се борела против германската воена машинерија.
Во текот на војната, Александре двапати успеала да избега од Гестапо, а нејзината група подоцна имала важна улога во ослободувањето на градот Тур.
По војната, се посветила на образованието и работела како учителка. Иако покажала исклучителна храброст, ретко зборувала за своето минато, велејќи дека само ја извршувала својата должност.
Впечатливо е тоа што во два наврати одбила да ја прими Легијата на честа, а во 2024 година сепак ја прифатила таа висока државна почест.
Нејзината смрт повторно ја потсети Франција на генерацијата што со огромна храброст ѝ се спротивстави на окупацијата, ја бранеше слободата и зад себе остави приказни што нема да бидат заборавени.
