Во Велика Британија, пријавени се повеќе од 200 смртни случаи кои може да бидат поврзани со лекови од групата GLP-1, кои се употребуваат за третман на дијабетес и за намалување на тежината.
Според британската Агенција за лекови и здравствени производи (MHRA), евидентирани се вкупно 216 случаи на смрт како можни несакани ефекти поврзани со овие терапии. Во овие пријави се вклучени лекови како што се Mounjaro, Ozempic, Wegovy и Saxenda.
Важен елемент е дека од MHRA нагласуваат дека самото пријавување не значи автоматски дека лековите биле причина за смрт. Ситуацијата опфаќа случаи со сомневање за поврзаност, и не секоя пријава укажува на докажана причинско-последична врска.
Лековите од оваа група стануваат се поупотребувани, особено за третман на дијабетес тип 2 и контролата на телесната тежина, поради што нивната безбедност и потенцијалните несакани ефекти се под постојано следење.
