По години на несвесно грицкање на ноктите, 21-годишната Габи Свјеревски се соочила со сериозен здравствен проблем. Развила тешка инфекција на прстот, откако грицкањето на ноктите и кожичките предизвикало оштетување на кожата.
Сè започнало со мала и болна раничка покрај ноктот, но наместо да исчезне, ситуацијата се влошила. Прстот почнал да и отекува и болката станала интензивна.
По првичната лекарска помош, добила антибиотик, но состојбата не се подобрила. Неколку дена потоа, болката била толку неподнослива дека морала да се упати во итна медицинска помош.
Лекарите откриле дека инфекцијата се проширила и дека имало насобран гној во прстот, што барало медицинска интервенција. Стравувале од сериозно оштетување на прстот ако состојбата не се поправи.
Габи подоцна сфатила дека грицкањето нокти и кожичките создало многу ситни повреди, кои им овозможиле на бактериите да навлезат во организмот и да предизвикаат инфекција позната како паранихија.
На среќа, инфекцијата била ставена под контрола и таа успеала да го спаси прстот. Нејзиното искуство служи како предупредување дека грицкањето нокти не е само естетска навика, туку може да има сериозни последици.
