Рецепт за посни палачинки

Најлесен рецепт за посна мешавина од палачинки.

Палачинките се омилен деликатес на сите генерации, а за нивната подготовка не се потребни скапи состојки. Можат да бидат солени и слатки, а бидејќи Велигденскиот пост е во тек, научете како да ја подготвите брзата верзија. Воопшто не е комплицирано, процедурата е иста како кај обичните, единствено нема јајца ни млеко. Уживајте во вкусот на совршено и евтино задоволство, а намазите можете да ги користите по желба.

Состојки:

• 300 гр брашно
• 500 мл кисела вода
• 1 кесичка прашок за пециво
• 1/2 кесичка сода бикарбона
• 50 мл масло
• прстофат сол

За полнење можете да користите:

• ореви
• џем
• шеќер
• посен евро крем

Подготовка:

Измешајте го просеаното брашно со прашокот за пециво и сода бикарбоната, па додадете масло, кисела вода и сол. Изматете ги состојките. Тавата премачкајте ја со масло, а потоа прелијте ја со лажичка од смесата и убаво распоредете ја. Пржете од едната и од другата страна и така правете додека не ја потрошите целата смеса. Можете да ги посипете со мелени ореви, шеќер или да ги премачкате со џем, посен еурокрем…